كشفت سيدة أمام محكمة الأسرة أزمتها أثناء إنهاء إجراءات طلاقها، وذلك بعد رحلة زواج طويلة امتدت إلى 18 عامًا، بدأت بالحب وانتهت بخلافات حادة بسبب زواج طليقها من أخرى ورفضه الإنفاق عليها، رغم أنها ارتضت بالأمر الواقع كونه تزوج عليها بعد عشرة السنين والأولاد بينهما.
زوجة تطلب الطلاق بعد عشرة 18 عامًا
وابتدت السيدة في كشف تفاصيل قصتها بكلمات: “بعد 18 سنة جواز و3 أولاد، اكتشفت إنه متجوز عليا… اتجوزنا عن حب من 18 سنة، وكان لسه في بداية طريقه، بس كنت شايفة فيه طموح إنه عايز يكبر ويبقى حاجة، فقررت أقف جنبه لحد ما يحقق حلمه، وكرست كل حياتي ووقتي لدعمه، وكنت مبسوطة وأنا شايفاه بيكبر واحدة واحدة لحد ما بقى رئيس شركة”.
وأضافت: “عدت علينا أيام صعبة، لكن رغم كده كنا كويسين مع بعض، وكانت المشاكل بتقربنا أكتر، وربنا رزقنا بـ3 أولاد كلهم دلوقتي في الجامعات، وعمري ما اتخيلت إنه يتجوز عليا بالشكل ده بعد كل السنين اللي عيشناها مع بعض، الأمور بدأت تتغير من سنة، حسيت إنه اتغير فجأة، بقى بعيد ومش زي الأول، وكان عندي إحساس إن في حد تاني في حياته، وواجهته.. في الأول حاول ينكر، وبعدين اعترف إنه متجوز من 3 سنين.. في اللحظة دي شوفت كل ذكرياتنا بتمر قدام عيني، ومش قادرة أستوعب إن الشخص اللي حبيته وأديته عمري يعمل فيَّ كده”.
وتابعت: “بعد ما الموضوع بقى أمرًا واقعًا، حاولت أتحمل وأتأقلم علشان أولادي ومستقبلهم، ومكنتش عايزة البيت يتخرب، لكن ما قدرتش، فقررت أبعد فترة مؤقتة مع ولادي لحد ما أهدى وأفكر، لكنه رفض”.