رويدا رجب بكري تحصد المركز الأول ببطولة الجمهورية للكاراتيه لذوي الهمم
حققت اللاعبة رويدا رجب بكري، ذات الـ14 عامًا وطالبة الصف الثاني الإعدادي، من مدينة ههيا بمحافظة الشرقية، إنجازاً كبيراً بفوزها بالمركز الأول في بطولة الجمهورية للكاراتيه لذوي الهمم، البطولة اللي اقيمت بالصالة المغطاة بجامعة حلوان.
بداية رحلة رويدا مع الكاراتيه
رويدا كشفت أنها بدأت رحلتها مع الكاراتيه من عمر 4 سنوات. وعلى مدار السنين دي، حرصت على تطوير نفسها علشان توصل لمستوى احترافي. شاركت في أكتر من 10 بطولات على مستوى محافظة الشرقية، كمان شاركت في 3 بطولات جمهورية، وآخرها كانت بطولة حلوان. وأكدت إن الإعاقة “عمرها ماكانت عائق” قدام أحلامها، بل بالعكس، كانت دافع قوي ليها عشان تحقق التميز والتحدي.
دعم الأسرة والمدرب سرّ التفوق
اللاعبة رويدا ضافت إن والدتها كان ليها الدور الأكبر في تشجيعها ودعمها طول رحلتها في الكاراتيه، رغم كل الصعوبات الي واجهتها في البداية. مش بس كده، الكابتن كريم المدرب الخاص بيها، كان بيساعدها بشكل كبير في تطوير مستواها الفني، والفضل يرجع للتدريب المنتظم تلات مرات أسبوعياً. وختمت كلامها بأن حلمها الكبير هو المشاركة في بطولة العالم للكاراتيه والوصول للقب بطلة العالم.
في نفس السياق، “الكابتن كريم بنوي”، مدرب الكاراتيه بنادي ههيا الرياضي، عبر عن فخره الشديد بـ “أبطالنا من ذوي الهمم”، مؤكدًا إنهم أثبتوا إن مفيش حاجة اسمها مستحيل، وإن الإرادة الحقيقية كفيلة إنها توصل لأي قمة وترفع اسم مصر دايمًا.
وأوضح الكابتن كريم إن النجاح ده مش مجرد صدفة، لأ ده نتيجة “شغل وتعب كبير جوه النادي”، واللي قدر يطلع أبطال على أعلى مستوى، ده غير إن النادي قدم أبطال عالم في الكاراتيه. وده “دليل على قوة المنظومة والجهد المبذول” من الجميع.
وختامًا لكلامه، وجه الكابتن كريم تحية وتقدير خاص لأولياء الأمور، وإعتبرهم “السند الحقيقي” ورا كل بطل، بدعمهم وصبرهم وإيمانهم بأولادهم لحد ما وصلوا للحظة النجاح دي.